Gary Barlow: No Doutgebuert vun Duechter ënner Schock

RTL - 07.08.2012, 07:19 | Fir d'lescht aktualiséiert: 07.08.2012, 07:51

De Gary Barlow a seng Fra Dawn erliewen am Moment déi schwéierst Wochen an hirem Liewen. Hir Duechter ass dout op d'Welt komm.

De Gary Barlow op der Bühn mat sengem Ex-Band-Kolleg Robbie Williams© AFP (Archivbild)
Déi traureg Noriicht huet de britesche Sänger iwwert e Presse-Communiqué matgedeelt. "D'Dawn an ech sinn um Buedem zerstéiert matdeelen ze mussen, datt mir eise Puppelche verluer hunn. D'Poppy Barlow ass de 4. August dout op d'Welt komm."

Elo wéilt d'Famill sech drëm këmmeren deem klenge Meedchen e schéint Begriefnis z'arrangéieren an hir 3 Kanner vu ganzem Häerz gär ze hunn. Si giffen och dorëm bieden, datt hir Privatsphär an dëser schwéierer Zäit giff respektéiert ginn.

D'Dawn an de Gary Barlow hu sech 1995 kennegeléiert, wéi si dem Gary seng Band Take That als Dänzerin op der Tour begleed huet. 5 Joer drop hu si sech bestuet an hunn haut 3 Kanner am Alter vun 3, 9 an 11 Joer.