Äiffeltuerm: Mobilier vum "Jules Verne" gëtt versteet

RTL - 02.08.2012, 08:21 | Fir d'lescht aktualiséiert: 02.08.2012, 08:37

Zu Paräis kënnt an den nächste Wochen de Mobilier vum bekannten Äiffeltuerm-Restaurant "Jules Verne" ënnert den Hummer.

© AFP
Wéi d'Auktiounshaus "Chayette & Cheval" matgedeelt huet, sollen déi vum Designer Slavik Vassiliew geschafe Miwwel de 27. September versteet ginn.

1983 hat d'Bedreiwungsgesellschaft vum Äiffeltuerm d'Miwwel beim Designer an Optrag ginn, fir de gastronomesche Restaurant "Jules Verne" nei anzeriichten. 2007 goufen déi ganz schwaarz-wäiss Miwwelen duerch en neien Decor ersat an elo solle se dann definitiv en neie Besëtzer fannen.

Verschidde Start-Präisser sinn awer ganz buedemstänneg, sou kritt ee Still scho vun 80 Euro un. Fir e schwaarz-lackéierte Fligel a verschidde Balustrade muss een awer wahrscheinlech vill méi op den Dësch leeën.