Iwwergewiicht an Zockerkrankheet ginn suwuel vun der Weltgesonheetsorganisatioun, wi vun der Europäescher Unioun an och eisen nationalen Gesondheetautoritéiten als 2 Prioritéiten an der Gesondheet unerkannt, wou sech kollektiv muss fir eng fréizäiteg Präventioun a Behandlung agesat ginn, fir schlemm Konsequenzen ze vermeiden.

D’Zuel vu Persounen mat Iwwergewiicht an och d’Zuel vun den Diabetiker klëmmt vu Joer zu Joer an onsem Land. Bis ewell si scho méi ewéi 4 % vun der Bevëlkerung, dat sinn ongeféier 20 000 Leit vum Diabete betraff.

Wat een ëmmer méi al gëtt, wat de Risiko klëmmt, a vill Leit si scho vun der Krankheet betraff mä wëssen et selwer nach net.
Et ass leider och esou, datt emmer méi Jugendlecher Problemer mat Iwwergewiicht hunn an och den Typ2 Diabetes scho laang keen Alterszocker mi ass, mee emmer méi jonk Leit ënner dëser Krankheet leiden. A wann dësen Diabete net richteg behandelt gëtt, kënne schwéier Komplikatiounen optrieden.

Dofir ass et wichteg dës Krankheet fréizäiteg ze erkennen a richteg ze behandelen !

Profitéiert vun den Aktiounen di am November hei zu Lëtzebuerg organiséiert ginn, fir Iech iwwer dës Krankheet ze informéiren an test Äre Risiko mat Hëllef vum FindRisk-Questionnaire.

Wat ass eigentlech Diabete?

Den Diabete ass eng chronesch Stoffwiesselkrankheet déi duerch en erhéichten Bluttzockerwäert gekennzeechent ass.

Et muss een tëscht 2 Haaptformen vun Diabete ënnerscheeden:

Typ 1 Diabete
Dës Form trëtt meeschtens virun dem 30ten Liewensjoer op: d'Bauchspäicheldrüs produzéiert keen Insulin méi, en absoluten Insulinmangel ass d'Resultat an déi eenzeg Therapie sinn Insulininjektiounen.

Typ 2 Diabete
Den Typ 2 mécht sech gewéinlech eréischt an der 2ten Liewenshalschent bemierkbar an ass ganz heefeg op Iwwergewiicht an Beweegungsmangel zeréckzeféieren. Vun dëser Form sinn 90 % vun de Mënsche betraff. Leider hunn hautzudags ëmmer méi jonk Leit an och Jugendlecher scho Problemer mat Typ 2 Diabete.

Bei dëser Form vun der Zockerkrankheet, wierkt den Insulin net méi sou gutt, et schwätzt ee vun Insulinresistenz, di sech mat der Zäit zu engem Insulinmangel entwéckelt. Well dës Entwécklung ganz lues a progressiv ass, bleiwen déi markant Zeechen vun der Krankheet oft laang onbemierkt

D'Behandlung fänkt gewéinlech mat engem Regime un, mat méi Beweegung a spéider mat Medikamenter oder Insulininjektiounen.

Fir de Bluttzockerwäert erauszefannen muss de Bluttzocker regelméisseg gemoos ginn.

Ee schlecht oder guer net behandelten Diabete kann extrem Komplikatiounen erbäiruffen an huet dacks dramatesch Konsequenzen fir d'Gesondheet an d'Liewensqualitéit.

Ech wëll mech teste loossen

FINDRISK-Test

EDUDORA2

D'Maison du Diabète

D'Maison du Diabète vun der ALD (Association Luxembourgeoise du Diabète), beréit an empfänkt all déi Persounen déi vun Diabete betraff sinn.

Wat bitt d'Maison du Diabète un?

- Schoulungsprogrammer, Informatiounsversammlungen a Konferenzen
- Spezifesch Consultatiounen a Beroodungen
- d'Zeitung „Le Journal du Diabétique“
- Gratis Dokumentatiounen a Bicher déi ee léine kann
- Verkaf vun SOS-Medaillen an Thermotäsche fir den Insulin
- Fräizäitaktivitéiten, sozial Manifestatiounen, Wandergruppen

Dir wëllt weider Informatiounen, Dir sidd interesséiert u Formatiounen oder enger kompetenter Beroodung, villäicht fir bei enger flotter Wanderung dobäi ze sinn....?

An der Maison du Diabète léiert Dir Leit kennen déi och vun der Zockerkrankheet bertraff sinn, Dir kënnt Experienzen austauschen a kritt och verschidden Informatiounen iwwert den Ëmgang mat der Krankheet.

D'Maison du Diabète fannt Dir op:
143, rue de Mühlenbach
L-2168 Luxembourg-Eich

Tel.: +352 48 53 61
Fax: +352 26 123 748

Öffnungszäiten